Indien die vorm hierbo nie werk nie, stuur asb. ‘n e-pos aan info@atterburytheatre.co.za met jou intekeningbesonderhede.

Goeiedag Atterbury Teater Vriende,

Aan die einde van 2018 kyk ons met groot dankbaarheid terug na ‘n besige jaar met uitstekende vertonings, die beste kunstenaars wat hulle talente met soveel grasie en liefde gedeel  het, ongelooflike ondersteuning van al ons teater vriende, ‘n teaterspan wat vreeslik hard gewerk het en altyd bereid is om meer as die ekstra kilometer te loop, skoonmakers wat ten alle tye moet inspring en help, die Atterbury Trust se onvoorwaardelike ondersteuning waarsonder die Teater nie sal bestaan nie en bowenal die mildelike seën en liefde van ons Hemelse Vader.

Die goeie nuus is dat na 8 jaar en honderde vertonings, het die Atterbury Trust besluit dat dit tyd is om die Teater op te gradeer en ons kan nie wag om op 1 Februarie te open met ‘n splinternuwe Teater nie, met nuwe matte, nuutgestoffeerde stoele, ‘n groter Foyer, alles geverf en gepoets en vele meer opknappings – die ou teater  gaan weer splinternuut lyk!

Ons is al hard besig om vertonings vir 2019 op iTickets oop te maak aangesien ons Teaterkaartjies vanaf 2019 nie meer op Computicket nie, maar op iTickets verkoop sal word. Die ou Computicket kantoor sal voortbestaan as die “Atterbury Box Office” en sal nog steeds telefoniese besprekings hanteer en kliënte help met besprekings.

Vertonings om na uit in 2019:

1 Februarie 2019 20h00 – Glansryke Heropening Konsert met Karen Zoid en Band

Kom geniet die glansryke opening van die nuutgetooide Attebury Teater op 1 Februarie om 20:00 met ‘n glas sjampanje, ‘n uitmuntende konsert met die gewilde Karen Zoid en haar begaafde musikante en nog ‘n paar verrassings. Dis jou kans om weer ‘n slag jou feesklere uit te haal en saam fees te vier.

2 Februarie 2019 20h00 – Stef Bos: Ruimte

RUIMTE

Oor spring in die onbekende

Soek verby die grens

Soek verby jou stem

Soek verby wat jy ken

In jouself

En in die wereld buite

Want

Daar altijd n wereld

Wat ons nog nie ken nie

Altyd n taal wat ons nie verstaan

Altyd n wonder wat ons nie kan verklaar nie

Altyd n stem van binne wat praat

Altyd n grens om oor te gaan

RUIMTE gaan vanaf 2 februari in Pretoria n jaar lang op reis

Van Amsterdam naar Windhoek

Van Brussel naar Oos Londen

Van die kop naar die hart

5 Februarie 2019 20h00 – Jan Blohm

Wanneer jy al als in die lewe probeer en ervaar het. Wanneer jou pelgrimstogte deurgetrap is en jou kruispaaie, deurkruis is. Wanneer jy selfs die hardste edelgesteentes en Ruby’s van die verlede deurkou het en jy vrede gemaak het met met jou verlede en wat die wêreld daarbuite van jou dink. Wanneer jy jou lisensie gekry het vir selfaanvaarding, eers dan, dan ervaar die rykdom wat elke mens so na smag; Die Liefde.

Die Liefde Album is Jan Blohm se nuutste vrystelling na ses jaar, maar is nie gevul met heuning-lirieke wat drup nie, maar eerder die rou, eerlike waarheid wat nét Jan kan vasmessel in ‘n album gevul Blues, Rock & Poëtry.

Dié rebelseun wat ons leer ken het, is nou ouer en meer volwasse. ‘n Jan wat glo dat in die tye waarin ons tans leef, LIEFDE al is wat die wêreld nou nodig het. Dít kan jy hoor in sy lirieke, sy passie in die stiltes tussen woorde, terwyl sy eerlike, rou akoestiese melodië jou hartsnare pluk net soos die sterk kitaargedrewe Liefde-album homself.

Jan glo nie aan tweedehandse liefde nie en glo liefde is ‘n doen-ding, nie ‘n sê-ding. Juis waaroor hy ook respektiewelik hierdie album opgeneem het waar die musikante gelyktydig gespeel het tydens die opnames en hy glo dit die hartklop van die album gaan wees. Eerlik en rou, nés die liefde!

Jan se orkeslede was hands on betrokke by die vervaardiging van hierdie album met sy unieke, warm rock-klank. Jan glo ‘n album is nie ‘n mengsel van liedjies nie, néé, jy skryf ‘n album. Met ‘n begin en ‘n einde; nes ‘n liefdesroman.

Hy’t dit goed reggekry saam met sy spanmaats; John Masser op kitaar en backing vocals, Francois Kleinhans ook op kitaar. Tinus Odendaal op dromme en die bekende Danny Lalouette op Bass.

Jan Blohm se debuutalbum wat in 2004 verskyn het, Melkstraat Confession, het die rock-wêreld op sy kop gedraai nadat hy in 2005 met die GMT-Toekennings die kollig gesteel het met ‘Album van die jaar’.

Vele ander toekennings het daarna gevolg- Jan is ‘n ‘Rocker’ met meer toekennings as kitare ‘n paar jaar terug!

‘n Musikale sirkel wat begin het met frustrasies, teenkanting, sonder begrip en hoop, is vandag voltooi met selfaanvaarding en die grootste van als; Die Liefde…Jan Blohm breek die kontras tussen rock en liefde, en gaan jou harde rocker’s hart laat smelt met sy nuutste; Die Liefde Album!

6 – 8 Februarie 2019 20h00 – Schalk Bezuidenhout: Snorseun

Schalk Bezuidenhout, die krulkopkomediant met sy kenmerkende truitjies en skerp tong, is die mees opwindende nuwe stem in Suid-Afrikaanse stand-up. Sedert hierdie boorling van Kempton Park in 2015 (en weer 2017) in Trevor Noah se voorprogram opgetree het en ‘n solo-vertoning op Comedy Central uitgesaai is, het hy vinnig ‘n huishoudelike naam geraak.

Hy het ook reeds twee Comics Choice-toekennings en ’n gesogte SAFTA ingepalm. Schalk is deesdae ‘n bekende gesig op televisie, veral in die rol van die geliefde Danny in die kykNET-reeks Hotel en as anker van die satiriese nuusprogram Die Ware Naarheid met Schalk Bezuidenhout, ook op kykNET. Teatergangers kan uitsien na die snorseun op sy beste, met nuwe materiaal, vlymskerp waarnemings en sosiale kommentaar oor die lewe en die land waarin ons leef.

Snorseun sal baie reaksies by jou uitlok, waarvan lag sommer lag-lag die grootste is.

10 Februarie 2019 16h00 – ESPAÑA

Helena en Maria Montoya bied saam met hulle student en professionele dansers Espana, ‘n energieke Spaanse Dans produksie aan, op 10 Februarie 2019 by die Atterbury Teater.

Die vertoning bied aan ‘n fees van modern en tradisionele Spaanse danse, vurige en betowerende musiek – n fees vir al die sintuie en verryking vir die siel! Alle kaartjie inkomstes sal direk gaan aan CANSA.

12 Feruarie 2019 20h00 – Mathys Roets en Dana Snyman: Lag van die Huil

Mathys en Dana neem jou saam op ‘n bittersoet storiereis wat jou soms sal laat lag en soms verdrietig sal maak. Nes die lewe maar is. ‘n Splinternuwe produksie met musiek en woord saamgesnoer.

“Dit is wonderlik hoe sekere musiek en bepaalde stories mekaar aantrek,” se Mathys. “Ek sing byvoorbeeld Gert Vlok Nel se Hillside Lullaby. Dit het Dana dadelik herinner aan ‘n storie oor ‘n swanger kroegmeisie wat hy geskryf het. Op ‘n manier praat die liedjie en die storie met mekaar.”

Een van die liedjies wat Mathys sing, Nardus du Plooy se In My Lewe, het ook ‘n spesiale betekenis vir Dana. Nardus het jare gelede die liedjie gesing op die begrafnis van ‘n vriend van hul albei. Die vriend het sy eie lewe geneem. In my Lewe is ‘n soort getuigskrif vir al ons middelklaskinders wat in die suburbs en op die platteland grootgeword het,” se Dana. “Party van my stories, dink ek in alle nederigheid, doen dieselfde. Om te weet wie jy is, glo ek, jy moet weet waar jy vandaan kom. En hoe kan ‘n mens dit beter ontdek as met behulp van musiek en stories?”

“Omtrent elke liedjie wat ek sing, vertel ‘n storie,” se Mathys. “Dit is asof ek en Dana die hele tyd in gesprek is met mekaar.”

Mathys vertel ook van sy vriendskap met Lucas Maree en dit het weer vir Dana herinner aan ‘n storie wat Lucas vertel het van hoe sy ouma op ‘n Sondagmiddag wou wegloop van Prieska af. “My ma wou ook soms wegloop van die platteland af,” se Dana. “Ek het ‘n storie oor sulke vrouens om te vertel.”

Beide van hulle is baie opgewonde oor die produksie.”Is intelligente musiek en stories nie op die ou end al wat ons het om mekaar en die lewe se dieper dinge te verstaan nie?” vra hulle.

13 Februarie 2019 20h00 – Jak de Priester: Op ‘n ander Planeet

Op ‘n ander planeet is Jak de Priester se nuutse, oorspronklike produksie met 14 nuut geskrewe liedjies wat ook in 2019 op die album; In die Kol bekend gestel word. Vir die eerste keer in Jak de Priester se 16 jaar loopbaan gaan sy produksie ook gepaard met sy eie abstrakte kunswerke getiteld Op ‘n ander planeet wat sal deel uitmaak van die stel van sy nuutse produksie. Hierdie is van Jak de Priester se opwindendste werk tot op hede.

14 Februarie 2019 19h00 – Nataniël: Funny Valentine

Nataniël gaan sy heel eerste Valentynsdag vertoning ooit by die Atterbury Teater aanbied op 14 Februarie om 2019. Funny Valentine bied ‘n nuwe seleksie musiek en stories. Nataniël was nog nooit bekend  vir liedjies oor die liefde nie, maar wel oor die lewe, dood, oorlog, vrede, individualiteit, familie, spoke, gewigsverlies, persoonlike oortuigings, twyfel en dapperheid, maar omtrent nooit oor verlief wees nie.

Daar sal slegs een vertoning van Funny Valenrine wees op 14 Februarie met ‘n program van sy persoonlike keuse van die mees ongewone, ongelooflike, tydlose en oorspronklike liefdesliedjies. Nataniël sal die verhoog deel met Charl du Plessis (klavier) en Werner Spies (basviool).

Die Kaalkop winkel sal in die foyer beskikbaar wees. Geen kinders onder 15 jaar nie.

16 Februarie 2019 20h00 – Spoegwolf: KOMA Album Launch

Spoegwolf is ‘n Afrikaanse musiekgroep van die PaarlSuid-Afrika wat in Februarie 2012 gestig is. Die groep bestaan uit Moskou du Toit (tromme, perkussie en sang), Chris von Wielligh (kitaar, klavier), Albert van der Merwe (baskitaar, sang) en Danie du Toit (sang, kitaar). Van hulle treffers is “Loerie”, “Lenie Blou”, “Bittermaan” en “Somerset-Wes”.

Spoegwolf stel hulle vierde album, Koma by die Atterbury Teater vry op 16 Februarie om 20:00.

17 Februarie 2019 17h00 – Rocco de Villiers SondagKlavier

SONDAGKLAVIER is ’n spesiale, rare en eenmalige geleentheid om gewilde pianist Rocco de Villiers te hoor sonder agtergrondmusiek of orkes. Die program bring wat Rocco die beste doen – een klavier, een Rocco, een pak klere, baie gunstelinge – en soveel meer! Solo Rocco!

Met klavier alleen speel en gesels Rocco oor musiek – bekende, onbekende, nuwe, ou, vreemde, tranetrekkers, komiese en dan natuurlik n paar verrassings! Moenie hierdie sielvolle geleentheid om musiek soos van ouds op Sondae te luister, mis nie.

20 – 24 Februarie 2019 Verskeie Tye – Drie Susters

Met Lizz Meiring (Christine); Margit Meyer-Rödenbeck (Anel) & Nicole Holm (Bianca)

(Moontlik gemaak deur Innibos Kunstefees).

 

Kom reis saam met drie susters deur die slaggate en mynvelde van verhoudings, vrou- en ma-wees. Christine, Anel en Bianca se vlug na Thailand is vertraag. Dis Christine se 50ste verjaarsdag en dis die tweeling se verjaarsdag geskenk aan haar. Hoekom moet Anel en Bianca altyd inmeng? ‘n Bord sushi sou net so goed gewees het. Sy weet hulle is familie, maar hulle weet ook sy’s bang vir vlieg.

Terwyl die susters die tyd verwyl met kaarte, boeke, cappuccino’s en vlymskerp tonge word lewenskeuses uitmekaar getrek en ou koeie opgegrawe. Want hier sit hulle nou. Die vlug is vertraag en sy’s hoog op kalmeerpille. Bianca is vas oortuig sy’t hulle verlore ma gesien. Anel praat met ‘n aantreklik man. Christine maak haar oë toe. Sy droom van stilte. Absolute stilte. Sy wens partykeer haar man en seuns wil net verdwyn. Sy mag dit nie dink nie, maar…. sê nou maar, sê nou maar Thailand is die antwoord.

Sal hulle ooit daar kom? Of is almal net te vlugvoos? Drie susters is ʼn  dramedy geskryf deur Louis Pretorius van Die Boekklub-faam.

26 Februarie 2019 20h00 – Uit die Bloute

Uit die Bloute – weer op die planke na twee dekades en “steeds huilmooi!” (Charles Smith – Volksblad)

Hierdie musiekteaterproduksie het teatergangers telkemale op hulle voete gehad sedert die onlangse opening by Innibos- en Vrystaatse Kunstefeeste.

Fiësta-wenner (beste akteur) Paul du Toit en Jenna Dunster speel die meerdere rolle “met ‘n jeugdige vitaliteit wat perfek aanpas by die verbeeldingryke skrywer Eugène Marais se grenslose visies” (Paul Boekooi – Beeld).

Uit die Bloute het gehore by die onlangse Innibos-, Vrystaat- en Aardklop Kunstefeeste op hulle voete gehad.

Eugéne Marais is ‘n meesterlike storieverteller en die verhale en tydlose gedigte wat in hierdie produksie op die verhoog lewe kry, boei die gehoor van die eerste word af.

Twee kortverhale van Eugéne Marais kry verbeeldingryk gestalte op die verhoog: “Die Lied van die Reën” vertel die storie van die soeke na water en in die tweede storie, “Salas Y Gomez”, word ‘n jong boer vir maande vasgekeer op ‘n rotslys en hy moet al sy kragte inspan om fisies en emosioneel te oorleef.

Die musiek vir Uit die Bloute is gekomponeer deur bekroonde musikant en ATKV Crescendo-wenner, Lizanne Barnard wat haar 11 toonsettings van Marais se gedigte in ‘n gekombineerde styl van Afrika-klanke vermeng met moderne elemente verwerk het. Bygestaan deur veteraan- musikante Jahn Beukes, Leon Ecroignard en die jong Pyjama Shark word die plaaswerf, die berge van Mamatola en die diepste emosies van die karakters deur musiek en byklanke ingekleur. Die resultaat: ‘n onvergeetlike ervaring in Afrikaanse musiekteater wat tegelyk vermaak, ontroer en iets wat gehore lank sal onthou.

Ons sien uit na ‘n propvol Februarie en wens al ons Nuusbrief vriende graag veilge reise, ‘n heerlike vakansie en ‘n Geseënde Kersfees  toe.

Kersfees is ‘n tyd van liefde,

‘n tyd van omgee,

‘n tyd van jubelende dankbaarheid

oor ons grootste Geskenk.

Teater groete,

Paulette

Indien die vorm hierbo nie werk nie, stuur asb. ‘n e-pos aan info@atterburytheatre.co.za met jou intekeningbesonderhede.

[/av_three_fourth]

Goeiedag Atterbury Nuusbrief vriende,Die vakansie is insig maar daar is darem nog ‘n hele paar vertonings in Desember om na uit te sien tot die Teater op 15 Desember vir 2018 sluit:3 Desember 2018 20h00 – Adam Barnard en VriendeAdam Barnard en sy Romanz-Broers,Louis Loock, Andre Venter en Burgerd Botha deel vir een aand die Atterbury Teater verhoog. Elkeen gaan sy eie gunstelinge doen asook n paar van hul gesamentlike treffers. Jakkie Louw kom verras ook as gaskunstenaar.9 Desember 2018 17h00 – Kevin Fraser Live (Komedie)Kevin Fraser het as n DJ begin optree van hy 16 jaar oud is in sy tuisdorp Durban en jare later na Johannesburg verhuis om sy loopbaan voort te sit in 2013. Sedertdien het hy n groot gevolg en reputasie opgebou en bekend geword vir sy veelsydigheid en energie wat hy na die verhoog bring. Met sy natuurlike talent om mense te laat lag het hy van DJ tot komediant ontwikkel en na Australiël verhuis maar reis nou na vele lande met vertonings vir sy wêreldwye “fans”.11 & 13 Desember 2018 20h00 – Kersstories met Jannie en CorleaDie jaar staan alweer op sy kop en soos oudergewoonte is twee van ons gunstelinge terug op die Atterbury teater verhoog met ‘n nuwe produksie, spesiaal vir die feesgety!Jannie en Corlea staan nie net bekend as twee van die grootste stemme in ons industrie nie, maar ook vir die wonderlike manier waarop hulle elke gehoor meevoer. In “Kersfees stories”, hoor ons verhale van wyd en suid, so kleurvol soos die liggies om die boom gestring.Hulle deel spesiale gedigte, elkeen spesifiek gekies soos handgemaakte ornamente, en hang dit plek-plek om ons gedagtes te versier. Die musiek is die kern van die reis – van outydse, tot hedendaagse treffers, sal elkeen uniek en mooi getooi wees soos die geskenke onder die boom.Kom geniet hierdie splinternuwe vertoning – dis die perfekte manier om die feesseisoen te betree!14 Desember 2018 18h00 – Bheki Mkhatshwa Live Recording Kom word deel van ‘n lewendige DVD en CD opname van Bheki Mkhatshwa se vertoning “Psalms of our Restoration”. Dit is n spirituele Gospel geleentheid om hertel te bring aan dit wat die vyand in ons spirituele lewe gesteel het, deur lofprysing en aanbidding.15 Desember 2018 11h00 – Kloppetie Klop se Kersfees Flop (spesiaal vir ons kinders) Kersfees kom al hoe nader en daar is groot opgewondenheid in Kersvaders se Kershuis. Maar o wee … o nee… daar is ‘n groot kinkel in die kerskabel. Klein Kersklits kabouters het die kersklappers ontdek en Klopetie klop is skoonveld weg! Wat vang die Kerskabouter nou weer aan?Besprekings by:082 572 2408 ofyolandie@enteractive.co.za15 Desember 2018 19h00 – Ou Krismis met Brown Suga and FriendsAs kinders kon ons nie wag vir die vakansie die einde van die jaar nie, natuurlik die Kersvakansie! Op die laaste skooldag van laerskole het al die klasse partytjie gehou. Al die kinders, wat dit kon bekostig, het dan lekkernye gebring en en sommige het selfs ‘n radio skooltoe geneem om musiek te verskaf.Dit het die atmosfeer van die vakansie ingelui want dan was daar altyd musiek in die agtergrond. My oom het altyd een of twee langspeelplate elke maand gekoop en as as dié wat hy wou koop nie beskikbaar was nie, het hy dit van oorsee bestel.Steve’s Records in Marabie, Jerusalem Straat was die plek om te wees. Die aangrypende stories van die turbulente strate van Marabastad, op die noordelike buitewyke van Pretoria moet liewer oorgelaat word aan die kleva (wyseman) in sy Floorsheim Vikings.Ou Krismis was die beste dag van alle dae, die neefs en niggies, anties en ooms het almal by Ouma se huis bymekaar gekom. Ouma sou vir een van die anties vra: “Het julle die tong gekoop?” Die ooms het op die agterstoep gesit en na al die oldies geluister en gewissel tussen Motown en die Sound van Philly.Dit laat mens dink aan kunstenaars soos Herold, Mervin and Blue Notes, Jackson 5, Billy Paul, Barry White, Teddy Pendergrass om net ‘n paar te noem. Laat Brown Suga en vriende julle terugneem na daardie Ou Krismis aand by ouma se huis….Ons is al hard besig om vertonings vir 2019 op itickets oop te maak aangesien ons Teaterkaartjies vanaf 2019 nie meer op Computicket nie, maar op iTickets verkoop sal word. Die ou Computicket kantoor sal voortbestaan as die Atterbury Box Office en sal nog steeds telefoniese besprekings hanteer en kliënte help met besprekings.Die laaste Nuusbrief vir 2018 volg binnekort met inligting oor van ons mooi “nuwe” teater wat op Februarie nuutgetooi, sal open, asook oor al die al die opwindende vertonings vir 2019!Groete,Paulette